Pamiarsa ....
Kacunduk malih sareng titiang ring pidarta basa bali. Pidarta basa bali, inggih punika pidato sane nganggen basa bali. Duk nguni, sampun kasurat conto-contoh pidato basa bali. Sinalih tunggil ngeninin indik Ngrajegang Basa Bali. Daging pidarta punika ngeninin indik basa bali sane sampun arang kaanggen olih para yowanane. Utawi conto pidarto basa bali sane majudul Trihita Karana
Ri kala mangkin, jagi katurang contoh pidato utami conto pidarta basa bali sane anut kaanggen ritat kala perpisahan. Utamani perpisahan ring Sekolah Dasar (SD). Nanging, ring SMP lan SMA boya nenten dados. Pidarta puniki dados kaanggen ring makasami tingkat sekolah, kewala becikne kaanutang manut ring tingkat sekolah soang-soang.
Pidato puniki taler anggen genah melajah Basa Bali
Kawitin Titiang:
Kepala Sekolah Dasar Negeri 1 Banjarangkan, sane wangiang titiang,
Taler Bapak lan Ibu Guru sane kusumayang titiang.
Ketua komite, lan uleman sareng sami,taler sane wangiang titiang.
Asapunika raris para sawitra, timpal-timpal titiang, ring kelas VI rauh ke kelas I Sekolah Dasar Negeri 1 Banjarangkan, sane tresna asihin titiang.
Sadurung titiang lantur ngaturang samatra perpisahan, ngiring sareng sami ngaturang pangastuti, majeng ring ida sanghyang widhi wasa. Mapan antuk pasuicen ida, titiang prasida rauh meriki, taler Bapak lan Ibu sinamian prasida ngrauhin acara Perpisahan puniki,antuk penganjali,Om Swastyastu
Bapak lan ibu guru,raris para uleman sinamian. Ring galah puniki, titiang dados penyeledi murid kelas VI Sekolah Dasar Negeri 1 Banjarangkan, jaga ngawentenan samatra atur, ring ajeng Bapak lan Ibu sareng sami, pamekas ring Acara Perpisahan puniki.
Pinih riin majeng ring Bapak lan Ibu guru, sane sampun mapaica ajah-ajah. Tur sampun mapaica kaweruhan, wiadin pawarah-warah ring sikian titiang, pamekas sisya kelas VI. Titiang dados wakil wiadin penyeledi murid kelas VI, ngaturang suksma ring parikrama sane sampun kapica ring titiang sareng sami. Napi sane sampun kalaksanayang mangdane titiang murid kelas VI, prasida uning ring tastra, resep ring widya, wiadin sastra, taler resep ring tata titi anggah unggihing norma-norma ring pergaulan. Titiang ngaturang suksmaning manah. Mapan, nenten wenten sane jagi anggen titiang ngwales pican Bapak lan ibu guru sinamian.
Taler, ring galah becik puniki, titiang nglungsur gung rna sinampura. Mapan ring selantang titiang nunas ajah, nyastra wiadin tastra,pastika titiang polih melaksana sane nenten becik, laksane sane kaon, nenten sepatutne kalaksanayang olih murid wiadin sisya. Minakadi, titiang engsap makarya PR, uyut ring tengah kelas ritat kala Bapak lan Ibu guru mapaica ajah-ajah. Antuk punika,malih pisan titiang nglungsur pangampara banget. Mapan, titiang kantun wimuda, kanton karare-raren. Durung prasida nganutin tingkah anake masekolah. Malih pisan, ampurayang titiang sareng sami.
Bapak lan ibu guru, Taler uleman Sareng sami"
Lanturang titiang malih samatra, atur titiang ring galah becik puniki. Ri paletan sane mangkin, atur titiang katuju mantuk ring para sisya sinamian. Utamaning adik kelas asapunika taler ring kelas VI sinamian.
Titiang dewek taler sisya kelas VI sinamian, ngidih pelih, wiadin pangampura, yening wenten solah titiang sane nenten patut rikala iraga sareng sami masekolah driki.Galah 6 warsa punika lantang pisan. Krana kasuen, pastika sampun wenten sinalih tunggil solah wiadin polah titiang sane begug, piwal, kual, bengkung, sigug wiadin solah jelek sane lianan. Ring galah puniki, titiang nunas mangdane makasami solah tiang sane nenten manut ring angga sarira, wiadin adnyana kaampurayang. Mapan, i manusa mula genah sakancan kajelekan.
Mantuk ring adik kelas, pamekas sisya kelas V rauh kelas I, titiang meled taler ngaturang piteket. Piteket titiang nenten sios mangdane sisya kelas I rauh kelas V, mangda seleg melajah. Pirengang pangandikan dane Bapak lan Ibu guru. Mapan, wantah dane sane prasida nuntun, ngardi iraga sami antuk widya, sastra, lan tastra. Duaning asapunika, ngiring wit mangkin, iraga ngawitin malih negesang tatujon iraga masekolah.
Ainggih,Bapak lan Ibu Guru, tur para uleman sinamian. Wantah amunika prasida titiang matur ring kanjekan mangkin. Titiang nglungsur gung rena sinampura, yening wenten sauh atur titiang. Asapunika taler ngeninin basa basita sane dahat nista, nenten anut ring tata titi basa basita.
Inggih, puputang titiang antuk nguncarang paramasanthi.
Om Santih,Santih,SAntih,Om
Asapunika prasida kasurat contoh pidato bahasa bali ring perpisahan sekolah. Perpisahan sekolah sane ngwarsa apisan punika becik anggen galah nunas pangampura ring makasami warga sekolah.
Dumogi sasuratan ring ajeng prasida ngawewehin pidarta-pidarta basa bali sane sampun akeh kasurat ring internet.
Puput.
Tidak ada komentar:
Posting Komentar
Masukkan komentar dan atau pertanyaan .......