SATUA BALI : MEN SUGIH LAN MEN TIWAS

Niki satua bali selanturnya, sane sampun kaposting makudang conto satua bali ring blog titiang puniki. Satua puniki, taler boya ja titiang sane ngawi, titiang wantah nyuratang malih satua puniki sane sampun ka unggahang olih makudang-kudang blog wiadin Media tiosan.

Yadiastun asapunika, kautamaning tatuek satue pinaka tatujon titiang nurun satuane puniki. Mapan, satua Men Sugih Lan Men Tiwas, sujati mabuat pisan tatuek ipun. Gargita manah titiang, yening ratu ida dane sane ngwacen satuane puniki prasida nggangget pikolih becik lan dados anggen sasuluh, rikalaning nyiksik bulu. Mapan, tuwuh ngaran tuhu sujati, mangda prasida katincapang malih, anggen gegawan utawi senjata nugtugang idup ri jagate jimbar.

Nenten, panjang atur malih, aturang titiang satue Bali Men Sugih lan Men Lacur sekadi ring sor puniki

Men Sugih lan Men Tiwas

Di desa anu, ada jatma ajak dadua idup mabanjaran. Nanging, idup ipune matiosan pisan. Sane abesik sugihne tan kadi-kadi. Arta brana sekadi membah. Carik tanah tegal akeh. Papayasan tan kasor. Ring satuane puniki kaparabin Men Sugih.

Buin besik, kewentenane mabinayan pisan. Kaling ke nyen papayasan sarwa bungah, umah manten ipun tuara ngelah. Umah tongos ipun masayuban rikala sabeh, ngetis ritat kala panes, tan doh sekadi kubu. Ampura, sekadi kubon sampine.

Nanging, yadiastun sekadi punika, ipun tetap matimpal, masawitra. Yadiastun, parilaksana lan paripolah ipun makedadua mabinayan pesan

Paripolah ipun sekadi lemah kalawan peteng. Men Sugih anak sugih pesan, nanging demit tur iri ati, jail teken anak lacur. Mabina ajak Men Tiwas. Buka adane tiwas pesan, nanging melah solahne, tusing taen jail teken timpal, ten ngelah keneh demit tur iri ati. Men sugih dados mekel (bos) di desane, mabinayan ken Men Tiwas geginane ngalih saang ke alase lakar adepa ka peken.

Di Nuju dina anu, Men Tiwas ka umah Men Sugih ngidih api. TangaN ipun nganjali buka mecik manggis. Konden maan ipun ngidih api, ditu Men Sugih ngomong, "Ih nyai Tiwas. Alihin ja icang kutu, yen suba telah kutun icange, nyanan upahina baas".

Men tiwas, tuara juari tempal. Laut Men Tiwas ngalihin kutu Men Sugihe. Suba tengai mara suud. Sekadi tel munyine Men Sugih, ditu Men Tiwas kopahin baas acrongcong. Kenel kenehne Men Tiwas maan upah baas. Tan pa lali ngucap suksma, ipun ngenggalang mulih laut baase jakana. Pakretap ia nyakan di jalikane. Bibihne bujuh ngupin semprong.

Di umah Men sugihe aturang titiang, ia Men Sugih buin masiksikan, mapan genit sirahne konden ilang. Ri subane apakpakan base, ia maan kutu aukud. Ngenggalang ia ka umah Men Tiwase, laut ngomong, "Ih Nyai Tiwas, ene icang maan kutu aukud, jani mai uliang baas icange ituni".

Makesiab Men tiwas, kabilbil Men Tiwas masaut, "Yeh, baase suba jakan tiang".

Masaut Men Sugih, "Nah, ento suba aba mai anggon pasilih!".

Sekadi menang aketi bangsit Men sugih. Mapan jani maan nasi suba lebeng tuara tuyuh. Nasine ane makire lebeng ento laut juanga konyang ka pancine abana mulih baan Men Sugih. Nyanane buin teka Men Sugih, "Ih Tiwas, tuni Nyai ngidih api teken saang icange". Tan pa lantang raos, ditu lantas api teken saange apesel gede juanga teken Men Sugih.

Men Tiwas bengong mapangenan nepuk unduke buka keto.
Lacur!.
Paketeltel yeh paninggalane, negak dibucun balene tuara nyidaang ngomong apa.

Ratu betara.....

Tan katuturang unduke ane majalan, liwat.
Sawatara ada duang wuku, Men Tiwas tundena nebuk padi baan Men Sugih lakar upahina baas duang crongcong. Sakeng polosne Men Tiwas, ipun nyak nebuk padine kanti pragat. Laut, upahina baas duang crongcong. Sekadi biasane, Men Tiwas encol mulih lantas nyakan.

Men Sugih lantas nyeksek baas. Makesiab ipun, mapan ipun maan latah dadua.

Encol ia ka umah Men Tiwas laut ngomong, "Ih Tiwas ene baase enu misi latah dadua, jani uliang baas icange, yen suba majakan ento suba aba mai". Keto raosne sada bangras.

Men Tiwas tan pa daya, tan prasida nembahang sakitan Men Sugih. Ipun usap-usap pipine kucel belus ulian yeh mata. Ipun bengong, kabilbil, ngamigmig nyambat Ida Batara. Nyelselin dewekne belog.

Tan kacrita galah suba majalan. Lemah peteng, semeng kaliwatin sanja rauh. Idupne Men Tiwas nenten sayan ngamecikang, malah sayan layu, sayan sengsara. Mapan, sehananing upakerti, upadaya sane sampun kautsahayang durung prasida nincapang kawentenan. Tuah urip sane kantun tekek ring angga sariran ipune.

Nanging, egar ipune sing ada ane ngasorang. Ipun tetep tekek ring tutur budi pakerti. Tetep mautsaha sekancan tindak, lan paminehne nenten lempas ring pahala lan karma. Ipun tetap ngambel pitutur ayu sang sujana. Sang wikan.

Ne mangkin tuturang titiang malih, indik pejalan ipun men tiwas ngalih saang ri tengah alase.

Sedek dina anu Men Tiwas luas ka alase, krasak-krosok ngalih saang. Ipun granggang grenggeng padidian nyalimurang manah. Matembang kisi-kisi. Tembang pucung ngangget gita. Idup sekadi memanjakit kranjang padang.............

Saget teka Sang Kidang laut ngomong, "Men Tiwas apa alih ditu?"

Masaut Men Tiwas tan panolih, "Tiang ngalih saang teken paku".

"Lakar anggon gena ngalih paku?"

Masaut ipun Men Tiwas, "Lakar anggon tiang jukut".

Pati grepe jerijinne Men tiwas, milihin don pakune ane luwung anggon jukut. Peliatne tan lempas ring entik pakune

"Ih Tiwas lamun nyak Nyai nyeluk jit icange, ditu ada pabaang nira teken Nyai!"

Nyeledet Men Tiwas. Raris matolihan. Katonanga ada kidang gading metanduk mas di arep ipune. Makleteg keneh ipune. Sira Jro sane meraga kidang. Ngamigmig ipun. Nyingakin kidang lemu lan sekadi mesunar. Durung inget ken paukudane, Men tiwas raris katakenin.

Ken-ken Men Tiwas? Nyak apa sing. Yen sing, manira lakar matilar.

Lantas Men Tiwas nyak nyeluk jit kidange, mara kedenga, limane bek misi mas teken selaka. Suud keto Sang Kidang ngilang. Men Tiwas ngusap-usap peningalan, tuara precaya teken paundukan ane nibenin. Mas-masane bitbita. Ipun kipak kipek masi tuara precaya. Mapan sekadi ngipi. Ipun negtegang bayu.

"Gelah tuara ngipi".

Men Tiwas kendel pesan lantas mulih. Teked jumah ia luas ke pande ngae gelang, bungkung teken kalung.

Men Tiwas jani sugih nadak, pianakne makejang mapanganggo bungah, lantas ia pesu mablanja. Tepukina Men Tiwas teken Men Sugih. Delak-delik ia ngiwasin pianak Men Tiwase.

Saking kenehne iri tur sasika, buin manine Men Sugih mlali ka umah Men Tiwase matakon, "Ih Tiwas, dija Nyai maan mas selaka liu?".

Masaut Men Tiwas, "Kene embok, ibi tiang luas ka alase ngalih saang teken paku lakar jukut, saget ada kidang, nunden tiang nyeluk jitne. Lantas seluk tiang, mara kedeng tiang limane ditu maan emas teken selaka liu." Mare ningeh keto. Men Sugih ngencolang mulih tan papamit.

Manine Men Sugih ngemalunin luas ke alase, Men Sugih nyaru-nyaru buka anak tiwas, krasak-krosok ngalih saang teken paku.

Saget teka Sang Kidang, "Nyen ento krasak-krosok?".

Masaut Men Sugih, "Tiang Men Tiwas, uli puan tiang tuara nyakan".

Men Sugih kendel pesan kenehne.

Lantas masaut Sang Kidang, "Ih Tiwas, mai seluk jit nirane!".

Mara keto lantas seluka jit kidange, laut kijem jit kidange, Men Sugih paide abana ka dui-duine. Patikaplug, nguyak ketket lan canging. Men Sugih ngeling aduh-aduh katulung-tulung,"Nunas ica tulung tiang, tiang kapok!".

Teked di pangkunge mara Men Sugih lebanga, awakne telah babak belur tur sing inget ken dewek. Tangkahne kebut-kebut. Angkihane enduk pesan. Disubane inget ia magaang mulih.

Teked jumahne lantas ia gelem. Awakne ngebus dingin. Tatune tusing nyak tuh. Sayan benyeh. Kudang balian kaden subak mapitulung ngubadin awakne Men Sugih, tuara endus ubat. Wenten kirang langkung tigang sasih, Men Sugih ngemasin mati.

PUPUT

Inggih, wantah asapunika, titiang prasida nedun satuane puniki. Dumogi ratu ida dane prasida ngangget tatwek satuane baduur. Kirang langkung antuk titiang, titiang nunas agung rna sinampura.