SATUA BALI : I CICING GUDIG

Ada katuturang satua I Cicing Gudig. I Cicing Gudig, buka adanne awakne berag arig, berag tegreg tur ukudane keskes gudig. Bulune telah aas, tur daki cuil. Asing jalana mlispis - ngalih tetadahan-, ada dogen anak ngesekang wiadin nglantig. Sesai ia maselselan, nyelselang buat kanistan -kalacuranne- idup dadi cicing. Mapan, makejang anake tuara ada ne ngiyengin-ngasihin-.

Satua I Cicing Gudig

Peken, rikalaning pekenan akeh anake mablanja. Anake medagang masi liu. Makudang-kudang dagang marerod saling sampingin. Sarwa dagang pada rauh. Nah, Rikalaning dina pekenan I Cicing Gudig mlispis di pekene. Ditu ia ngojog dagang nasi. Ada anak madaar di dagang nasine. Ento kone nengnenga menek tuun. Ngantosang entungi amah-amahan utawi atebih tulang.

Jug uli dija kaden, saget mekleteg di kenehne i Cicing Guding. Kene kenehne "Yan i dewek dadi manusa buka anake ento, kenken ya legan kenehe ngamah, mebe soroh ane melah-melah, jaen-jaen. Suargane katon. Ah kene baan, nyanan petenge lakar tangkil ke Pura Dalem, mabakti tur mapinunas majeng ring Ida Batari Durga, apang kadagingin i dewek dadi manusa."

Kacrita suba peteng. Tengah lemeng peteng detdet. Damar suba kadampeh. Anake suba pada pules, nyelingkut kalilit saput. Gumine sepi litig, nanging krana jengah bakal ngisinin kenehne I Cicing Gudig, tangkil ka pura Dalem. Ia mabakti ngacep-acep Ida Batari Durga. Ngasih-ngasih mapinunas masemu jengis. Medal lantas Ida Betari Durga tur ngandika teken I Cicing Gudig, "Ih iba Cicing Gudig, dadi iba ngacep nira. Iba ngulgul payogan gelah. Apa ane ada katunasang?". Masaut I Cicing Gudig, "Inggih paduka Betari, yan paduka Betari ledang, titiang mapinunas mangda dados manusa."

Tan lantang kasatuayang indik penangkilan i Cicing Gudig. Kalugra sekadi pinunasne I Cicing Gudig. I Cicing gudig lantas ia dadi jlema. Lega pesan kenehne, mapan pinunasanne kadagingin. Nanging.......

Dening I Cicing Gudig tusing bisa ngalih gae, pragat nyodog dogen. Tusing ngelah papineh bakal ngalih pangupa jiwa. Lemah peteng tuah di penggake dogen. Lenenge ngangsan alus mapan I Cicing Gudig maplisahan, nyodogin. Mapan cara keto bikasne I Cicing Gudik, makrana ia tusing pati ngamah. Mara-maraan ngamah ulihan maan mamaling. Di agetne ngamah ulian ngalih sisan-sisan nasi ane kaentungang di tongos leluhune. Pepes kone ia katara mamaling. Krana lekig, tusing ada anak asih ken I Cicing Gudig.

Masa ken dewekne lara, lantas buin kone ia mabakti di Pura Dalem. Medal lantas Ida Betari Durga tur ngandika teken I Cicing Gudig, "Ih iba cai I Cicing Gudig, ngenken dadi iba buin mai?" Matur I Cicing Gudig, "Inggih paduka Betari, titiang tan demen dados manusa panjak. Yan paduka Betari ledang, titiang mapinunas mangda dados "Patih". Ida Betari Durga lugra.

Nuju pesan dugase ento Ida Sang Prabu ngrereh pepatih buin adiri. I Cicing Gudig, jug nyuksukang dewek apang kakandikaang. Liu munyinne I Cicing Gudig, raris kandikaang dadi Patih. Misi buka kenehne I Cicing Gudig. ia ngiring.

Konden asasih mejalan ia ngiring dadi patih, ada sek dikenehne. Kene ia ngurimik, "Beh keweh pesan i dewek dadi Pepatih, tusing maan ngenken-ngenken, begbeg pesan kandikayang tangkil ka puri. Yan i dewek dadi Anak Agung, kenken ya legan nyete nunden-nunden dogen. sinah idupe elah." Nyanan petengne buin ia mabakti di Pura Dalem, mapinunasang apang dadi Anak Agung. Ida Betari Durga lugra, lantas patuh pesan kone goban I Cicing Gudige teken warnan Ida Sang Prabu.

Kacrita sedek dina anu Sang Prabu lunga maboros ka alase, kairing panjak idane. Jug, macelig kone I Cicing Gudig ka puri. Dening patuh goban I Cicing Gudige teken Ida Sang Prabu, dadi ia kasengguh Ida Sang Prabu baan I Patih muah prayogiane ane len-lenan. Matur I Patih saha bakti, "Titiang mamitang lugra Ratu Sang Prabu, punapi awinan dados Cokor I Ratu paragan tulak saking paburon?" Ningeh atur I patih, masaut I Cicing Gudig, "Kene Patih, mawinan nira tulak, sakaning nira ngiringang sabdan ida Betara. Lemah ne jadi, tan kalugra nira malaksana mamati-mati. Kandikayang lantas nira tulak. Ento juru borose ada pinunas teken nira, tusing ngiring mantuk, krana kadunga suba makenaan. Nira nglugrahin, mawanan tan pairingan nira mulih." Keto pamunyinne I Cicing Gudig. Jug ngugu kone I Patih muah panjake ane len-lenan.

Mapan suba dadi prabu, kacrita sai-sai I Cicing Gudig ngundukang anak mawikara. Reh I Cicig Gudig tuara nawang lud-tusing ja idep, makejang wikaran anake pelih baana ngundukang. Ane patut menang kasoranga, anak patut kalah menanganga. Mawanan kaupet kone I Cicing Gudig dadi Agung. Sabilang wai ngencanin anak mawikara dogen, ngranayang ibuk kenehne I Cicing Gudig. Lamakana pesu buin reragragan tidong-tidong. Ngurimik ia padidian, "Yan I Dewek dadi okan Anak Agung, kenken ya demene, kema mai malali iringang parekan, di kenkene magandong, buina tusing pesan ngitungan apa-apa, sajawaning ngamah teken malali dogen."

Nyanan petengne, mabakti buin I Cicing Gudig di Pura Dalem, mapinunas apang dadi okan Anak Agung. Ida Betari Durga lugra. Patuh lantas gobanne I Cicing Gudig buka warnanida Raden Mantri.

Buin mani semenganne, maorta ilang kone lantas Ida Raden Mantri. Ya sedeng ewana jerone ngibukang Raden Mantri, deleng-deleng kone lantas I Cicing Gudig ngapuriang. Reh Cicing Gudig kasengguh Raden Mantri, makesiar kone keneh wang jerone makejang.

Konden a purnama liwat, Kacrita jani I Cicing Gudig kapurukang malajah masastra. Dening asing ajahina muah takonina I Cicing Gudig tuara karoan baana apa, saapan kone lantas gurune ngemplangin I Cicing Gudig. "Koang," keto kone aduhanne I Cicing Gudig. Dening keto, buin kone pasangetina ngemplangin I Cicing Gudig. "Koang," keto kone buin aduhanne. Buin kemplangina tur pasangetina, buin kone I Cicing Gudig makoangan. Brangti kone lantas gurunne, lantas ia nyemak penyalin anggona nigtig I Cicing Gudig, kanti enceh-enceh, mara kone suudanga.

Kacrita nyanan petengne ka Pura Dalem lantas I Cicing Gudig mabakti, mapinunas apang buin dadi Cicing Gudig buka jati mula. I Cicing Gudig lantas buin dadi cicing gudig.

Puput
Napi sane prasida kaanggit saking satuane baduur?
Sapa sira wong sane nenten anut tekening swadarma nganutin warnanne, pastika nenten nemu sane mawasta bagia. Tusing ada langit endep. Tur sekadi bukit johin.