Pidato Bahasa Bali Tri Hita Karana

Pada posting kita terdahulu, kita menyusun pidato bahasa bali atau sembrama wacana, atau pidarta basa bali, yang berjudul Pidato saraswati. Pada kesempatan ini kita mencoba menyusun Pidato Bahasa Bali Tri Hita karana.

Sambrama wacana indik Tri Hita Karana puniki, kasusun majalaran manah susrusa nganinin nglestariang basa Bali. Silih sinunggil sane jaga kababar indik tri hita karana. Inggih sambrama wacana indik tri hita karana jaga kakawitin.

Om Swastiastu,

Suksma banget aturang titiang, mantuk ring pangenter antuk galah sane kaicen.

Para pamiarsa, lanang istri, utamane para yowana sane prapta rauh ring genahe puniki.

Ring galah sane becik puniki, rikala iraga nincapanag kasukertan jagat, nincapang kaweruhan ring sajeroning nglimbakang kaasrian palemahan duene antuk sarwa entik-entikan, titiang ngaturang ring ajeng iratu idane sawitran titiang sane prasida rauh, utamane para yowana sinamian. Sambrama wacana puniki kapuspata Tri Hita karana.

Semeton sareng sami.....
Tri Hita karana, indik pahpahan ipun nenten malih titiang tuturang, bligbagang ring para pamiarsa, kewanten, ratu idadane jagi iring titiang ngawentenang panureksan ring palemahan duene soang-saoang. Dadosne sane jaga babar titiang ring ajeng ratu idadane sareng sami pahan tri hita karana sane kasengguh PALEMAHAN.

Pamiarsa sareng sami,
Palemahan, inggian ring tri hita karana ngaranya palemahan sane ngardi iraga nemu karahayuan, kasukertan. Palemahan taler sane ngranayang iraga sareng sami nemu duka, nemu kasangsaran. Napi mawinan asapunika?
Mangkin iring titiang pamiarsa sinamian, macecingak orta orti ring televisi, ring koran. Makudang-kudang genah utawi makudang-kudang jadma sane lampus, padem, mati krana i palemahan? Nika dados kaanggen pratiwimba, conto. Ring jagat Jawi, wenten lumpur lapindo, Ring Aceh wenten tsunami, Ring makudang-kudang genah wenten tanah gemid (longsor). Ring Kalimantan, Sulawesi, Jakarta, kudang umah, jero grya sane anyud olih blabur (banjir). Ring genah siosan, makudang-kudang jadma meweh ngaruruh toya sane jagi kaanggen nginem, napi malih mandus. Miwah ring genah lianan antuk kasengsaran, kabyahparan sane lianan.

Pamiarsa sareng sami
Napi sane ngawinan kabyahparan punika metu ring jagate?
Napike krana jagate sampuh wayah?
Napi krana pituduh Ida Sanghyang Parama Kawi?
Napi krana iraga nenten uning nenten urati ring kawentenan palemahan duwene?

Manut para sujana ring sejabag jagat, ngaturang hasil penelitian ipune. Makudang-kudang hasil penelitian tur  panureksan sampun kasurat ring surat kabar, ring majalah, ring tabloid, sane ngaturang indik kerusakan alam wiadin kosakan palemahan/jagad, pemanasan global, tur sane lianan. Nika kocap sane ngranayang kabyahparan, bancana ring jagate. Wanane sane sampun ngidikang. Taru-taru sane ngiket toya sabeh ring ulu sampun sayan telas. Nika makardi sabilang sabeh toyane membah ngranayang blabur. Abinge akeh sane gemid, tukade sayan nyerikang toyane. Nika boya ja ring dura desa manten asapunika.

Malih, aturang titiang mangkin. Indik toya. Para subake akeh sane ngrengkeng toyane kelang. Toyane keweh, toyane sukeh. Toyane nyat ring carike. Ngawinan sarwa tinandur nenten mupu, layu kirang toya, napi malih sabehe nenten janten rauh. Mapan eed jagat pemanasan global, iklim lan cuaca nenten pastika prasida kajantenang.

Semoton pamiarsa sareng sami.
Niki.......... niki sane patut raga tureksain.
Tri Hita Karana sane kaucap pamargi luih nemu karahuan, lan kerahajengan patut takenang malih. Napike kantun iraga sareng sami nglarang sane mawasta tri hita karana?
Napike iraga nglangrang wantah ring bibih, ring lambe komenten, nenten ring tindak, pilaku soang-soang diri mangdane bhuana agung lan bhuana alit prasida memargi becik?
Ngiring sareng sami, titiang ngajum iratu idadane sinamian, mangda mulat sarira, nyiksik bulu, utamane mantuk ring soang-soang diri.

Ngiring wit mangkin iraga patut mecikang palemahan soang-soang. Wit saking jero, grya, umah soang-soang. Ring pakarangan,, sampunang ka"beton" samian. Entik-entikane patut kapiara.
Ring telajakan patut katata mangda asri. Utamane got wiadin jlinding mangda resik saking luwu sampah, mangda nenten nyampetin got sane ngranayang banjir.

Ring teba wiadin bebanjaran, desa raris nglimbak malih ka pesisi rauh ka pasih, ka telaga taler. Samian genah nika patut katata, katitenin mangda prasida ajeg. Mangda prasida ngawetuang kasukertan jagat sami.
Ring pasisi wiadin pasih toyane dados ambu. Ambune mawetu dados gulem, raris i gulem tebal nedunang toya, ring gunung, ring alase, tur ring genah siosan. Yening nenten prasida ngiket i toya, pastika sampun blabur, wiadin banjir. Yening gote sampet, toyane maliah ka jalane rauh ke pakarangan tur selanturnyane.
Nika mawinan, iraga sareng sami patut nitenin. Palemahan sane becik, asri tur adem pasti ngranayang liang lan sukerta iraga sareng sami.

Inggih pamiarsa sareng sami,
para sujana, sane wangiang titiang.
Para yowane sane egarang titiang.
Wantah asapunika prasida titiang ngaturang ring ajeng sinamian, parindikan Tri Hita Karana. Dumogi wenten pikenohnya. Maka kirang wiadin langkung antuk titiang ngaturang ring ratu idadane sinamian, titiang nglungsur gung rena sinampura.
Mapan titiang nirdon ngaturang parindikan tri hita karana puniki, boya ja jagi nasikin segara, wantah ngelingang malih saparindikan tri hita karanane.

Suksma.
Om Santhi, Santhi, Santhi, Om

Demikianlah, contoh pidato wiadin pidarta basa bali sane majudul tri hita karena. Pidarta wiadin pidato bahasa bali sane ngeninin indik lingkungan, len raosne palemahan.
Puput.
Wenten pitaken? Ranjingan ring kolom komentar!