Macunduk malih sareng Pidarta Basa Bali ring Blog titiange puniki. Duk dumun sampun kasurat taler conto-contoh pidato wiadin pidarta basa bali minakadi Pidato Saraswati. Lan pidarta sane matema lingkungan, majudul Pidarta Basa Bali Sampah
.
Pidarta-pidarta punika tuah conto sane dados anggen nglimbakang pidarta-pidarta sane tiosan, pamekas sane ngangge basa Bali. Ring patemone mangkin, titiang jagi ngaturang pidarta basa Bali sane majudul Ngajegang Bali Majalaran Ngangge Basa Bali
Inggih, ngraris wedar titiang ring sor pidarta sane mamurda Ngajegang Bali Majalaran Ngangge Basa Bali.
Om Swastyastu
Pamiarsa sareng sami, utamaning semeton sane prasida rauh ring genah puniki.
Pinih Ajeng, Bapak wiadin Ibu Guru, taler sawitran titiang sinamian.
Ping kalih mantuk ring pangenter acara, aturang titiang suksma, lan rahajeng rahayu sareng sami.
Semeton sareng sami.
Ring aab jagate mangkin,rikala iraga mapajar wiadin komunikasi
, utamaning para yowanane, akeh sane nganggen bahasa Indonesia
. Sekadi, conto: Berapa harga pulpennya Satu?
, utawi: Buku kamu dimana?
. Asapunika kruna wiadin lengkara sane ketah sampun kaanggen oleh para yowanane ritatkala ngrawos sareng timpalnyane.
Napi ngranayang asapunika?
Napi ipun lek, kimud ngangge basa bali?
Napi ke mangda kaucap gaul
?.
Ri aab jagat kadi mangkin sayan sue sayan ngidikang wong baline sane mabebaosan utawi berkomunikasi ngangen basa Bali. Basa Bali kahananne sampun tan dados linguapranca
ring Bali. Pet kantun nika wantah ring padesaan, ring padusunan komanten.
Yening wenten anak mablanja wiadin matumbasan kadi conto ne wawu ngangge basa bali dadosne: Bapak/Ibu aji kuda pulpenne asiki?
, utawi
Bukun (nyoman/ketut lan sane siosan) dija?
.
Pastika sampun len antuk iraga mirengang, wenten manah sane kedaut ri tatkala mireng anak ngrawos kadi punika. Mapan, basa bali punika dahat luih manut ring tata titi lan basa basitane taler madue pangargan sane mautama ri sajeroning anggen mabebaosan.
Ratu idadane sareng sami, pamekas para atiti sinamian.
Iraga sareng sami embas - lekad - ring tanah bali puniki. Riantukan sekadi punika iraga dados jadma Bali. Jadma bali sane nyungsung nyunggi waris budaya lan tata krama sane sampun mentik tur kasungkemin duk dumun.
Raris, nika dados tetuek atur titiang mangkin. Ratu ida dane taler titiang, dados jadma bali, sane kapituduh olih Ida Sang Hyang Parama Kawi, mangda nglanturang kabudayan bali, ngalestariang seni lan budaya.
Nika pabesen sane kaping siki.
Kaping kalih
Raris, napi sane patut kamargiang mangdane iraga sareng sami prasida nglaksanayang swadarma dados jadma bali?
Iraga manumadi dados jadma bali, jagi ngangganin utawi urati ring tetamian saking leluur iragane. Silih sinunggil nenten sios marupa warisan budaya pamekas ipun basa kalih sastra bali, sane kasumbung luwih ring jagate.
Sapunapi antuk ngwerdiang kalih nglimbakang basa Bali iraga sareng sami?
Pamekas para yowana mangda ngawit mangkin sayan seneng malajahin utawi ngangge basa bali. Nenten ja ri umah, jro soang-soang, rauhing ritatkala mambaosan sareng timpal-timpale paturu jadma Bali.
Ratu ida Dane sareng sami.
Pamrentah sampun mautsaha, minakadi ngranjingang basa bali ri sajeroning kurikulum pendidikan formal-ring muatan lokal. Taler sampun nglaksanayang Utsawa Dharma Gita.
Nika silih sinunggil pinaka utsaha pamrentah ngeninin nglestariang budaya, lan basa bali ring Bali.
Raris, Napi sane sampun kautsahayang soang-soang iraga sami?
Sampun ke iraga taler mautsaha mangda basa baline tetep ajeg lan lestari?
Napi sane sampun kalaksanayang ?.
Pitaken titiange punika nenten jaga nunas pesaur. Kewala iraga soang-soang patut mapiteken raris nyaurin pitakene punika soang-soang, mantuk ring soang-soang diri.
Iraga newek mateken. Pesaure pastika manut sekadi utsaha, wiadin parilaksana sane sampun kalaksanayang sane matujon mangda Basa baline tetep ajeg lan lestari.
Raris...
Ratu, Ida dane sareng sami.
Nglantur malih atur titiange ne wawu, nganinin utsaha soang-soang diri mangda Basa Baline tetep ajeg lan lestari.
Mapan Ajeg Basa Bali, Pinaka Ajeg Gumi Bali
. Punapi antuk mangda soang-soang diri mautsaha ngawit mangkin ngangge basa bali. Tur katincapang, mangda prasida ngiyusin anak lian, - utamane para yowanane- mangda nenten lek wiadin kimud ngangge basa bali.
Ngiring wit mangkin, iraga ngangge basa Bali, mangda dados matanah pasih
biasa ring padewekan.
Ring kulawarga, rauh ring pasawitran, tur ring padunungan utawi pagubugan. Yening sampun asapunika, rasaang titiang, pastika iraga prasida ngajegang bali majalaran ngangge basa Bali.
Pastika sampun iraga dados jadma Bali tui. Jadma Bali sane ngukuhang, ngajegang basa bali, miwah kebudayan Baline. Sinah yening sampun sekadi punika,raos Ajeg Bali nenten dados lips service
wiadin bungan bibih
kemanten, nanging sampun rauh ring parilaksana, pamineh, tur bawos.
Ratu ida dane sareng sami.
Titiang nunas ampura banget, duaning titiang ngaturin sakadi punika. Santukan titiang menyonyo plastik dot pisan ngiringang ratu ida dane sareng sami mangdane sayan seneng, sayan nresnain basa bali. Nenten ring bibih,lambe komanten, nanging tresna ngrangsuk ring sajeroning adnyana, sajeroning manah, sajeroning angga sarira, sane prasida ngwangun, nincapang, nglimbakang, ngawerdiang, budaya, sastra lan basa bali druwene.
Nika sane sujati unteng pinunas titiang ring ajeng ratu ida dane sareng sami. Mapan, yening basa baline ical, makardi ical taler budaya lan sastra bali duwene.
Inggih, ratu Ida dane sareng sami sane tresna asihin titiang.
Wantah asapunika prasida aturang titiang ring patemone mangkin.
Cutetang titiang malih, ngiring sareng sami ngawit mangkin nyungkemin, jagi ngawerdiang tur nglimbakang budaya bali, utamane basa bali druene
. Yening sampun prasida antuk, pastika basa bali druena dados ajeg, rajeg, ring jagat Bali, raris prasida ngajegang jagat Bali.
Ratu ida dane sareng sami.
Puput atur titiange puniki. Prade wenten kirang wiadin langkung antuk titiang ngaturang, ping kalih wenten basa basitan titiange sane nenten manjing ring adnyana, ring sajeroning kayun, lugrang titiang nglungsur gung rna sinampura.
Mapan, akeh atur titiang, minab ta wenten sauh.
Raris...., titiang taler nglungsur pawarah ring para sujana, guna widya, sareng sami, marupa suluh lan titi anggen titiang nglanturang tuwuh ring kauripan puniki.
Pinaka pamutput atur, titiang ngaturang parama santih ...
Contoh Pidato Ngajegang Basa Bali
Contoh yang lain untuk pidato bahasa bali dengan tema Ngajegang Budaya lan Seni Budaya Bali, ngangge bahasa bali, berikut ini berjudul "MACAPAT MIWAH DHARMA GITA SILIH SINUNGGIL UTSAHA NGAJEGANG BALI"
Silakan disimak contoh pidato utawi pidarta ring Sor puniki!
Suksma katur ring pangenter acara antuk galah sane kapica ring titiang.
Bapak lan Ibu Guru sane wangiang titiang.
Pamekas Bapak/Ibu Kepala Sekolah sane Utamayang titiang.
Para sisya sinamian, sane ngamiletin pacentokan pidarta puniki
Tur ida dane sareng sinamian sane rawuh, sane tresna asihin titiang
Sadurung titiang ngelantur, pinaka pamungkah atur, lugrayang titiang ngaturang parama bagia majeng ring ida sang hyang widi wasa antuk pangastungkara panganjali:
"OM SWASTYASTU"
Inggih ida dane sane dahat wangiang titiang.
Pastika ida dane sampun tatas uning lan ngawikanan, indik kewentenan gumi bali sane kasengguh swarga ring marcepada. Indik punika sampun kaloktah wyakti. Sampu kasub rauh ka dura desa olih para janane sane wenten ring sawewengkon panegara Indonesia, muwah para jana ring dura Negara.
Napi ke sane mangawinang jagat Bali kabaos swarga marcepada?.
Ratu Ida dane sareng sami. Napi keranane gumi baline kasengguh swarga ring sekala?
Silih sinunggil sane makrana sekadi punika, sawireh kewentenan palemahan ring Bali kantun asri. Palemahan Bali sane presida ngawe angob sang sane ngantenang.
Lian ring punika, indik kawentenan tradisi druwene sane kantun kemargiang ring jagat Baline puniki. Kantun lestari. Duaning sekadi asapunika buat kautaman seni budaya miwah keasrian jagat ring Bali, sepatutnyane kautsahayang mangda prasida ajeg.
Iraga dados silih sinunggil warga Bali setata sepatutne miara, ngelestariang turmaning ngelimbakang malih. Napi malih ring kewentenan jagat sekadi mangkin, akeh pisan para jana sane rawuh ka Bali. Ipun madruwe tatujon sane matiosan. Wenten sane melancaran, wenten taler sane jaga ngerereh pangupa jiwa, wenten taler sane mlajah wiadin mauruk seni lan budaya Bali, taler wenten sane ngusak asik antuk narkoba .
Kawentenan punika pastika pacang nyampuhin keaslian tradisi miwah keasrian jagat Bali, sane kabantangin antuk TRI HITA KARANA.
Akeh pratiwimba utawi contoh-contoh sane katemuang seni lan budaya druwe sane sampun kecampuhin. Conto sane pinih ketara aturang titiang, minakadi akeh para alit-alite utamae wong Bali sane nenten resep lan ngidep ring tata titi basa Bali. Napi malih ring nyurat aksara Bali.
Mapan pamargin jagate sampun sekadi punika, napi anggen mangkin nambakin, mangdane pangeruh budaya dura negara nenten sayan-sayan ngeserang kaweruhan lan budaya Bali?
Minabang titiang, sane prasida anggen dugul, pengempel silih sinunggil inggih punika, “MACEPAT LAN UTSAWA DHARMAGITA.”
Napi tatuekne?
Yening iraga sareng sami minabdabin, ngalestariang seni budaya macepat lan utsawa darmagita, titiang merasa pastika, budaya lan basa balin druwene tetap ajeg. Mapan, ring macepat iraga ngangge basa bali sane halus, mabudi. Taler ring dharmagita, iraga akeh nemonin paplajahan, akeh tatuek tur pitutur-pitutur anggen titi pangancan ring kahuripan iraga.
Yening prasida lestari macepat lan dharmagita, minabang titiang, seni lan budaya druwene nenten prasida kageser, utawi budaya dura negara nenten prasida ngentosin kautaman lan kaweruhan tradisi Baline.
Inggih rata ida dane sareng sinamian,
Yening indike punika nenten kautsahayang, pastika seni, budaya, utawi tradisi Bali pacang sayan-sayan rered tur kebenjang pungkur pacang ngicalang.
Jalaran sane prasida kaanggen nglestaring budaya bali punika akeh pisan, silih sinunggil sekadi atur titiang ne wawu, ring sekolah patut nitenin indik basa bali, mangda sayan werdi. Ring soang-soang paumahan, mangdane ngangge basa bali ritatkala magendu wirasa, wiadin mabligbagan. Kenten taler ring sekeha-sekeha lan banjar utamane ring parum-parum pasangkepan, mangda basa bali sane kautamayang, sadurunge ngangge basa sane tiosan.
Semalihne ngiring tincapang lan werdiang seni lan budaya ring soang-soang pakubon, ring banjar, asapunika taler ring pemerintahan mangda ngawerdiang seni lan budaya Bali majalan Tembang macepat, lan Utsawa Dharma Gita.
Inggih ida dane sane sareng sinamian. Pamekas Bapak/lan Ibu Guru sane wangiang titiang. Wantah asapunika presida antuk titiang mapaungu atur ring galah mangkin. Dumogi wenten pikenohnyane.
Unjuk lungsur atur titiang, titiang nglungsur geng rna sinampura.
Putputang titiang antuk parama santhi.
OM SANTIH SANTIH SANTIH OM
Asapunika malih conto pidarta basa bali sane prasida katurang galahe mangkin. Dumogi wenten pikenohnyane anggen nglimbakang malih orti wiadin pidarto sane linana.
Ring galahe sane pacang rauh, dumadik dumadik prasida kasurat malih conto sane linanan.
Tidak ada komentar:
Posting Komentar
Masukkan komentar dan atau pertanyaan .......