Satua Bali Bawak sane Mamurda Peteng niki marupa Naratif Teks sane ngangge bahasa Bali.
Ne mangkin Tiang jagi ngawi anggen nagingin malih satua Bali bawak sane sampun wenten. Murdan satua Bali bawak sane jagi kakawi wantah PETENG. Nanging sadurungne titiang nglungsur gung rena sinampura, mapan pastika sampun wenten kekirangan wiadin kalangkungan antuk titiang nyurat daging kekawian puniki.
Kakawian punika, wantah apada carita indik peteng. Ring raos mangkine kaucap naratif teks utawi narative text ring basa Bali. Kawitin titiang antuk Om Awighnam astu nama sidam. Dumogi prasida antar lan wenten pikenoh ipun.
Peteng
Galahe mangkin sampun peteng. Langite galang maglandaran, nenten wenten gulem tur sayong ngalintang ring ambara. Sunar lintange pakenyitnyit saking driki, ring bongkol punyan jepune barak. Sanghyang bayu ngampehang don-donan tur kulite. Dingin. Awai sang surya masunar galak, sekadi nunjel jagat. Kebuse kalintang, makrana entik-entikan layu kirang toya, i manusa kebusan, ongkeb mlekpek. Nanging, ring petenge puniki, panese sampun kasalinin gesit.
Titiang kantun driki, ring bongkol punyan jepune barak. Ritat kala lipi api ring ambara, masrowet ngungsi ring kelod kauh. Duk punika, galahe sampun nangsek sawetara roras. Langite kantun pakenyitnyit matimpal wulan.
Gesit............., klambine sampun nenten prasida ngangetin awake dingin. Jaket taler nenten prasida ngulah i dingin. Nyeledet ka kubune, sundih di balene sampun kapademang. Keto taler di umah bebanjarane, samian sundihe sampun kapademang, tuah asiki sane kantun masuran. Sundih di natahe kantun masunar ngalangin natahe.
Manusane sampun pada masare, pules, ngengkis. Minab wenten sane ngipi, wenten sane ngerok. I Kuluk tusing ada ane ngongkong, minab ia suba pada medem, makepu di bucun umahe ngalih anget tanah.
Maclengik pireng suaran rare. Jro Nyoman Alit banjaran titiang madue oka kantun alit. Rare wawu petang sasih mangkin. Minab ipun nenten prasida naenang dingine. Pireng titiang, tangis ajebos raris sepi.
Peteng mangkin, peteng ring pinanggal masehi 10 Oktober 2013, wantah sujati nusuk tulang. Gesit.
Inggih.... wantah asapunika prasida aturang titiang, satua wiadin narative text miwah naratif teks ring basa Bali. Yening arsa raris cingak lan wacen Satua Bali I Siap Selem. Niki boya ja satua, niki wantah apada kekawian sane mamurda peteng. Daging ipune wantah tutur rikala wengi. Ampura antuk kirang wiadin langungnya.
Om Santih, Santih, Santih, Om
Tidak ada komentar:
Posting Komentar
Masukkan komentar dan atau pertanyaan .......